اوشاقليق اينانجيم

سحر خياوي

-اوردا من آللاهي گؤره‌جه‌يم مَشه‌دي ننه؟!
-يوخ قيزيم. آللاه گؤزه گؤرونسه بيزيم بيريميز اولار دا. او گؤزه گؤرونمز.
– اؤز ائوينده ده گؤرونمز؟!
– هه. اوز ائوينده ده گؤرونمز.
تانرينين نئجه اوز ائوينده ده گؤرونمزليگي اوشاقليق بئينيمه سيغيميردي. آخي آدام هر يئرده‌ ده گؤرونمه‌سه اوز ائوينده گؤرونسون گرک. مثلن بيز هئچ يئره گئتمه‌سک اؤز ائويميزده گؤرونوروک.– بس تانري نه دن اؤز ائوينه گلمير ننه؟!-او هر يئرده دير، آمما هئچ يئرده دئييل. بيزيم بويونوموزون داماريندان دا بيزه ياخين‌دير. شيخ منبرده دئييردي.
هر يئرده اولماق آمما هئچ يئرده اولماماق سينيرلاريمي پوزوردو. نئجه هر يئرده اولوب آمما هئچ يئرده اولماماق اولار؟!نئجه هئچ يئرده اولماييب بويون داماريندان بنده‌لره ياخين اولماق اولار؟!نه ايسه قاريشديريرديم. بئينيمين کلف‌لري بو سوزلردن پيرتلاشيردي. ننه‌م سَزيب »اوزولمه. يئکه‌لنده درس اوخويوب بيله‌جکسن«- دئدي.
بئينيم سورغو-سواللا دولو اولسا دا، سورغولاريمي ايچيمه چکيب بؤيوک ننه‌مله مسجيده ساري يولا دوشدوک. مسجيدين دار-دودوک پيلله‌لريندن شبستانا چيخديق.‌ من جيليز بير قيزجيغاز ايديم. پيشيک کيمي پيلله‌لري سوزوب باشيندا دوردوم، بؤيوک ننه‌م آغريلي ديزلريندن ياپيشيب، تؤشويه- تؤشويه هله پيلله‌لرين آياغيندا ايدي. هر بير پيلله چيخديغجا بيرآز دايانيب نفسيني دَريردي. سونرا يئنه بير پيلله چيخيردي. بويوک ننه‌مه يازيغيم گلدي.کئشگه اونو داليما گؤتوروب پيلله‌لري چيخاردا بيله‌يديم. آخير پيلله‌يه ياخين اليني توتدوم. گولومسه‌يرک اليمدن ياپيشيب اوچ پيلله‌ني ده يوخاري چيخدي.تئللريمي سيغاللاييب آلنيمدان اؤپدو. من اونون خينالي اللريني چوخ سئويرديم.
باشماقلاريميزي باشماق يئرينه قويوب شبستانا کئچديک. نئچه قاري ننه و گنج قادين دا ديوارلارا دايانيب اوتورموشدولار. بعضيلري ناماز قيليرديلار. بعضيلري ده عمّ جزء اوخويوردو.آللاهين ائوي چوخ بؤيوک ايدي. جان وئريردي قاچان- قاچان اويناماغا. آخي توخانماق اوچون هئچ نمنه آرادا دئييلدي. ائوده قاچاندا، ننه‌م آماندي سيماوارا توخونارسان، آماندي چايداني آشيرارسان و… بئله-بئله دئييردي. آللاهين ائوي بيزيم ائوين نئچه برابري ايدي. او بويدا ائوده تکي بير کونجده بيرآز قورآن کيتابي، بيرآز مؤهور جاناماز، بيرآز دا ننه‌لرين ناماز چاديراسي وار ايدي. هله آللاهين ائوينين آلت قاتي و هر ايکي قاتدا چايخاناسي دا وار ايدي.ننه‌م دستاماز آليب قاييتدي.نورلو اوزو داها ايشيقلانميشدي. سو دَنه‌لري آغ بنيزينده گول اوستونده سحر شئهينه بنزه‌ييردي. گؤزلري بؤيوتلو گؤزلوک آرخاسيندان ايشيلداييردي. بؤيوک ننه‌م لاپ مَلَک اولموشدو. قارا چادراسيني چيخارديب آغ کئشلي ناماز چادراسيني اؤرتموشدو. او دا ناماز قيلدي.من ايسه رنگ به رنگ شوشه‌سي اولان پنجره‌نين قاباغيندا اوتورموشدوم. گون اورتا گونشي‌نين ايشيقي بويالي شوشه‌لردن ايچري کئچيردي. من بير تالا رنگلي ايشيقا قيچلاريمي اوزاديب، اللريمي- آياقلاريمي بويالي ايشيقلارين قاباغينا توتموشدوم. بويالي ايشيقلار ال- آياغيمين اوستونده رقص ائديب جانيمي قيزديريرديلار. من او ايشيقلاردا ننه‌م دئين بوينومون داماريندان ياخين تانريني گؤروردوم. همين مهربان و باغيشلايان تانريني. ننه‌م نامازدا حضورلانيردي، من ايسه جانيمي ايسيدن بو سئحيرلي نوردا و بويالاردا.
قريب بير خلسه‌ده ايديم…ايچيمده بير شئي اريييب ايليق-ايليق دامارلاريما سوزوردو…
ننه‌م نامازيني قورتاردي. مني بؤيرونه چاغيردي. آمما من بو بويالي حوضورو الدن وئرمک ايسته‌ميرديم. آذان وئرديلر.ننه‌م‌له باشقا قادينلار يئنه ناماز قيلديلار. سونرالار ننه‌م دئدي کي اوّل قيلديغي قيسا ناماز مسجيد نامازي ايدي. ياني آللاهين ائوينين حؤرمتينه قيليب. گون داها او سئحيرلي پنجره‌دن چکيلميشدي.نامازدان سونرا بيرينجي قاتدا شيخ دانيشدي. من شبستانين دووارينين دئشيک‌لريندن شيخه و اوردا اوتوران کيشي‌لره باخديم.
او ننه‌م دئين منبرده اوتورموشدو. اوزون دون گئيميشدي. باشينا دا يووارلاق آغ بورک قويموشدو. ساققالي دا آغ- قارا، اوزون ايدي. من او قدر اونون نه دئديگيني دوشونموردوم. آمما ننه‌لر ائشيتديکجه سيلکه‌له‌نيرديلر.يورولدوم. بير ايکي آنا يوخسا بؤيوک آنالاريلا مسجيده گلن اوغلان- قيز اوشاقلاريلا مسجيدين مئيدانيني گئن گؤروب اورا- بورا قاچيشديق. بالاجا تپيک‌لريميزين آلتيندا، آلتي بوش شبستان تيتره‌ييردي. بيز داها موحکم قاچيب کئف ائله‌ييرديک. ننه‌لريميز بيزه گوز آغارديب، چکيب يانلاريندا اوتورتدولار.
شيخ سؤزلريني قورتاراندان سونرا ننه‌لر بيربيرينه آللاه اجر وئرسين، آللاه ثاواب وئرسين دئييب، گؤروشوب اؤپوشدولر. سونرا ائويميزه گئتمکدن اؤتورو دار- دودوک پيلله‌لره ساري گئتديک. بيز مسجيددن چيخاندا نارين ياغيش ياغيردي.‌ پيادا يولونون آغاجلاري ياغيشدا يويونوردولار.
ائويميز مسجيده ياخين ايدي دئيه بويوک ننه‌م مومکون اولسايدي نامازلاريني مسجيدده قيليردي. ثاواب‌دير دئييردي.مسجيدده منه نه اولموشدو بيلميرم. آمما قاييدان باش، سانکي گؤي يئره ياخينلاشميشدي. گونش آرتيق گونش اولموشدو. بالاجا اوره‌ييم سئرچه اوره‌يي کيمي دؤيونوردو. آياغلاريم سانکي يئرده دئييلدي. بير للک کيمي يونگولله‌شيب يئر ايله گوي آراسيندا اوچوردوم.چيسگين ياغيش بالاجا اوزومه چيله‌ييب کئفيمي داها تاماملاييردي.سونرالار بؤيودوم. نه دن چات گؤتوردو اينانجلاريم بيلمه‌ديم!!
بويوک ننه‌م دئين کيمي اولمادي. بيليک‌لريم چوخالديغجا تانري پيلله- پيلله مندن اوزاقلاشدي. او قدر اوزاقلاشدي حيطيميزده کي لاپ اوجا نردووانلا دا اونا چاتا بيلمه‌ديم. او اولدوزلاردان دا اوزاغا گئتدي.داها نه او مسجيد تيکرار اولدو، نه او بويالي شوشه‌لر، نه او حوضورلو گون اورتا چاغي. نه ده من داها او »من« اولدوم.کئشکه بؤيوک ننه‌م ساغ اولسايدي، بو سيرري اوندان سوروشارديم. بلکه سئحيرلي صانديغچاسيندا بو سورغونون جاوابي تاپيلايدي. آخي او گولاب اييسي وئرن صانديغچادا من سئوديگيم چوخ شئيلر وار ايدي.